Galtzagorri Elkartearen webgunea

liburu-gaztea
Bularretik Mintzora
Liburuen altxorra

Galtzaberri

Bilaketa:

Irakurzaletasuna sustatzeko irakasleentzako lantegietan parte hartzeko aukera dute erkidegoko 100 ikastetxek

Galtzagorri elkarteak bigarren urtez martxan jarriko ditu Irakurzaletasuna Sustatzeko Lantegiak Irakasleentzat, Eusko Jaurlaritzaren Hizkuntza Politikarako Sailburuordetzaren laguntzari esker. Egitasmo honen bitartez Euskal Autonomi Erkidegoko ehun eskolei aholkularitza zerbitzua eskainiko diegu 2019. urtean zehar. Iaz izena eman, eta parte hartzeko aukerarik izan ez zuten ikastetxeek lehentasuna izango dute aurtengo ekitaldian. Izena emateko Galtzagorrik prestatutako erreserba-formularioa bete behar dute eskolek lantegia egiteko egun eta ordu egokiena aukeratuta. Erreserba egiteko azken eguna otsailaren 22a da.

Amattoren uzta App-aren bigarren bertsioa sortu du Galtzagorri elkarteak

Klis-Klasikoak App bildumako hirugarrenean lehendik zeuden hiru kontakizun transmediei beste bi gehitu dizkie Galtzagorri elkarteak: AMA-ALABEN guda desafioa eta ITSASUAR BATEN beldurrezko abentura. Guztira bost istorio nabigagarri eskaintzen dizkie Amattoren Uzta app-aren bertsio berriak 8-12 urte bitarteko gaztetxoei.

Soto eta Indoren hitzaldiekin bukatuko da gaur 2019ko BIKO TEKA

Mikel Soto Txalapartako editore ohia eta Paxkal Indo ZTK argitaletxeko editorea ari dira gaur goizean Biko Teka tailerreko 17 sortzaileei album irudidunaren egoeraren berri ematen. Eta pista onak ematen argitalpen mundura hurbiltzeko. Honela bukatuko da galtzagorri elkarteak eta Iruñeko udalak elkarrekin antolatu duten album ilustratuaren hirugarren ilustrazioa eta narraziogintza tailerra.

Hasi da hirugarren BIKO-TEKA

17 lagun bildu dira goizetik Iruñeko Descalzos kaleko udal aretoan. Aste osoa dute aurretik idazle eta ilustratzaile bikote eta hirukoteek lan egiteko. Album ilustratua nola pentsatu, idatzi, ilustratu, sekuentziatu eta argitaratu landuko dute Biko Teka tailerraren baitan. Lehenengo egunetik ari dira istorioak sortzen eta lantzen Aitziber Alonsok eta Harkaitz Canok gidaturik.

Hastear da BIKO-TEKA haurrentzako liburu grafikoetarako ilustrazio eta narraziogintza tailerra

Urtarrilaren 28tik otsailaren 1era egingo dute Iruñean Galtzagorri elkarteak eta Iruñeko Udalak elkarlanean idazleak eta ilustratzaileak elkartuko dituen ikastaroa.   BIKO-TEKA tailerrak 17 sortzaile elkartuko ditu Iruñean urtarrilaren 28tik otsailaren 1era bitartean. Bikoteetan eta hirukotean elkarlanean arituko dira idazleak zein ilustratzaileak liburu ilustratu bat nola pentsatu, idatzi, sekuentziatu, marraztu eta argitaratu daitekeen landuz. Aurtengoa Galtzagorri elkarteak Iruñeko Udalarekin batera antolatzen duen hirugarren BIKO-TEKA da. Egitasmoa haurrentzako album ilustratuak sortzeko Etxepare Sariaren ekimenari esker jaio zen. Finean, tailerraren xede nagusia haurrentzako album ilustratu berriak sortzeko akuilu izatea da, baita sortzaile berrien prestakuntzan alea jartzea ere.

Dani Fanoren lanak ikusgai daude Aieteko Kultur Etxeko Ilustratzaileen Txokoan

Fanoren 20 bat ilustrazio martxoaren 10era arte ikusi ahalko dira; ondoren Maite Mutuberriaren erakusketa zabalduko dute

Dani Fanoren (Donostia, 1968) komiki binetak, aldizkarien azalak, material didaktikorako egindako kolaborazioak, liburuen azalak, zirriborroak, inspirazio iturri dituen elementuak eta beste hainbat material ikusgai daude Aieteko Kultur Etxeko Ilustratzailearen Txokoan. Fano moldakortasun eta trebetasun artistiko handiko ilustratzailea da eta bildumak 1990eko hamarkadatik egindako lanak jasotzen ditu. Halaber, erabili dituen euskarriak nahiz elementuak eta lan egin duen testuinguruak ere ikusgai daude. 

Jone Oiartzun andoaindarra eta Jon Martinez eibartarra gailendu dira Booktuberboom lehiaketaren II. edizioan

Eusko Jaurlaritzako Liburutegi Zerbitzuak, Gaztea Irratiak eta Galtzagorri Haur eta Gazte Literatura Elkarteak elkarlanean sortutako egitasmoa da BOOKTUBERBOOM. EAEko 14-18 urte bitarteko gazteen artean irakurzaletasuna sustatzeko helburuz jaio zen 2017an, eta 2018ko ekainetik abendura gauzatu da honen II. Edizioa.

Egitasmo honen baitan antolatzen den Booktuber Lehiaketaren irabazlea zein den erabaki du dagoeneko epaimahaiak: Jone Oiartzun andoaindarra. Publikoaren saria Jon Martinez eibartarrak irabazi du, iazko lehiaketaren irabazle izan zenak.

2019ko BIKO-TEKA tailerrean parte hartu ahal izateko azken astea

BIKO-TEKA izeneko Liburu grafikoetarako ilustrazio eta narraziogin tza tailerraren 2019ko edizioa urtarrilaren 28tik otsailaren 1era garatuko da. Urtarrilaren 14an bukatuko da Galtzagorri elkarteak Iruñeko Udalarekin lankidetzan hirugarren aldiz burutuko duen tailerrean parte hartu ahal izateko dokumentazioa bidaltzeko epea. Harkaitz Canok eta Aitziber Alonsok gidaturik, 37 ordu iraungo ditu guztira tailerrak. Aurrekoetan bezala, ilustratzaile eta idazleek bikoteka parte hartuko dute. Interesatuta dauden idazle eta ilustratzaileak bakarka edo bikoteka aurkeztu daitezke. Orotara, 8 bikote onartuko dira.

Zabalik dago BIKO-TEKA 2019n parte hartzeko epea

Galtzagorri elkarteak Iruñeko Udalarekin lankidetzan liburu grafikoetarako ilustrazio eta narraziogintza tailerraren hirugarren edizioa burutuko du Iruñean 2019ko urtarrilaren 28tik otsailaren 1era. Tailer hau Haurrentzako Album ilustratuak sortzeko Etxepare Sariaren ekimenari esker jaio eta gauzatzen da. Tailerraren xede nagusia haurrentzako euskarazko liburu grafiko edo album ilustratu berriak sortzeko akuilu izatea da.

2018ko haur- eta gazte-literaturako Lazarillo Sarien irabazleak jakitera eman dituzte

Hiru emakumezko sortzailek irabazi dute aurtengo edizioa: Paloma Corralek eta Begoña Orok album ilustratuaren kategorian irabazi dute; Andrea Maceirasek literatur-sormenaren atalean.

Lazarillo Sari ospetsua, haur- eta gazte-literaturan Espainiako estatuan sortutako lehenengo saria da, baita independenteena ere. 1986tik OEPLIk urtean behin egiten du Lazarillo Sarien deialdia hala album ilustratuaren atalean nola literatur-sormenaren atalean. Epaimahaia azaroaren 29an bildu zen eta sariak Madrileko 41. Haur- eta gazte-liburuaren Saloiaren inaugurazio ekitaldian banatuko dituzte, datorren abenduaren 12an.

Galtzagorri Elkartea · Zemoria 25, Behea 20013 Donostia ·