Galtzagorri Elkartearen webgunea

liburu-gaztea
Bularretik Mintzora
Liburuen altxorra

Galtzaberri

Bilaketa:

Lazarillo Sarien deialdi berria

2016ko Lazarillo Sarietan parte hartzeko deialdia egin du OEPLIk, Espainiako Hezkuntza, Kultura eta Kirol Ministerioaren babesarekin. Sariketa honen helburua haur eta gazteei zuzendutako liburuen kalitatezko liburuen produkzioa bultzatzea da. Egun bi sail ditu lehiaketa honek: bata, Album Ilustratuarena; bestea, Literatur Sorkuntzarena. Aurten, 3.000 euroko saria izango da modalitate bakoitzean.

Ainara Azpiazuren txanda Ilustratzailearen Txokoan

Iñaki Martiarena "Mattin" ilustratzailearen erakusketa amaituta, Ainara Azpiazu "Axpi"ren txanda da orain Ilustratzailearen Txokoan. Irudigile hernaniarraren liburuetako ilustrazioak, komiki tirak, karikaturak, egutegiak eta abar izango dira iksugai. Baita liburuak, objektuak eta zirriborroak ere. Irailaren 4a arte izango dira ikusgai Aieteko Kultur Etxean.

Gazte sortzaileentzako beka deialdia

Gazteek gazteentzat sortutako euskarazko ekitaldi kultural berriak sortzeko Gazte Sortzaileak beka deialdia egin dute Gasteizko Udalak, Arabako Foru Aldundiak eta Eusko Jaurlaritzak. 16 eta 35 urte bitarteko gazteek har dezakete parte bi kategoriatan banatuta: 16-24 urte eta 25-35 urte. Bakarka nahiz taldean aurkez daiteke proiektua: antzerkia, bakarrizketa, musika, bertsolaritza, poesia-emanaldia, ikus-entzunezkoa, performancea, diziplinen arteko nahasketa... Proposamenak aurkezteko epea 2016ko uztailaren 1ean amaituko da.

 

Mariaren Lagundiara, Axular Lizeora eta Landaberrira joan dira sari nagusiak

Olainloclau taldea (Mariaren Lagundia DBH1, Bergara) eta Esther Muxika eta Eider Garcia bikotea (Axular Lizeoa DBH4, Donostia) izan dira Liburu Gaztea Book Trailer Lehiaketako saritu nagusiak Ikastetxeen kategorian. Norbanakoen kategorian, berriz, Munduko Imajinarium taldeak (Landaberri BHI, DBH1, Lasarte-Oria) lortu du saria. Jakinminez eta emozioz betetako uneak izan dira gaurkoak. Liburu Gaztea Book Trailer Lehiaketako irabaleak jakinarazi eta sariak banatu ditugu Tabakaleran, ia berrehun lagunek bete duten zinema aretoan. Ikasleak Bergaratik, Eibartik, Villabonatik, Urnietatik, Lasarte-Oriatik eta Donostia bertatik etorri dira.  

Galtzagorri Elkartea ETB-1eko Sautrela saioan

Iñaki Markotegi, Galtzagorri Elkarteko lehendakaria, elkarrizketatu zuten apirilaren 30eko Sautrela saioan. "Zein da irakurzaletasunaren osasuna Euskal Herrian" izan zen saioaren goiburua eta Markotegik, besteak beste, Galtzagorri Elkartearen hainbat egitasmoren bidez bildutako irakurzaletasunaren datu kualitatiboak aipatu zituen. Benetan saio interesgarria, dagoeneko, nahieran ikusteko moduan dagoena.

Madelon, Gazteentzako Literatur Lehiaketa abian

EHGAMek (Euskal Herriko Gay eta Lesbiana Mugimenduak) gazteei zuzendutako V. Madelon Gazteentzako Literatura Lehiaketa jarri du martxan. Gaia librea izango da, baldintza bakar batekin, gay, lesbiana, bisexual edo transexualei buruz izatea. Bi kategoria izango ditu, bata 14-17 urte bitartekoa eta beste bat 18-tik 25-era bitartekoa. Lanak euskaraz nahiz gaztelaniaz aurkeztu daitezke kategoria berean. 2016ko urriaren 31 da lanak aurkezteko azken eguna.

Galtzagorri Elkartearen egitasmoen aurkezpena Hazparneko mediatekan

Maiatzaren 19an, Euskal Kultur Erakundeak, Bilketa Sareak eta Departamenduko Mailegu Liburutegiak Euskarazko Haur eta Gazte Literaturari buruzko egun profesionala antolatu dute. Hazparneko Mediatekan egingo da eta Galtzagorri Elkarteak ere parte hartuko du irakurketa sustatzeko sortu dituen egitasmoak azalduz. Baina ez da egun horretako hitzaldi bakarra izango, aurretik Imanol Mercerok "HGL zertan den - Gaur egunera nondik etorri garen begiratuta" hitzaldia emango du, eta, Durangaldeko Berbaro Elkarteak Haur literatur aretoa.eus web zerbitzua eta Saguganbara egitasmoa aurkeztuko ditu. Horrez gain, IKAS Pedagogia Zerbitzuko kideek ere azken 10 urteetako Iparraldeko haur eta gazte literaturaren ekoizpenaren aurkezpen orokor bat ere egingo dute.

Baditugu "Ipuinetako animalia bat adopta ezazu" lehiaketako irabazleak

Haur Liburuaren Nazioarteko Egunaren harira, OEPLIk, Espainiako Hezkuntza, Kultura eta Kirol Ministerioaren laguntzarekin, eta bere lau atalen bidez (Consejo General del Libro, ClijCat, Gálix y Galtzagorri) antolatutako "IPUINETAKO ANIMALIA BAT ADOPTA EZAZU" lehiaketak baditu irabazleak. Galtzagorri Elkarteak jasotako marrazkien artean hauek hautatu ditu irabazle: Lehen Irakurleen kategorian: Julian Goñi Moreno. LH 1. Nafarroako Liburutegia. Iruñea (Nafarroa). Irakurle Aurreratuen kategorian: Oier Urkiola Azurmendi. LH 3. Tolosako Udal Liburutegia (Gipuzkoa). Zorionak biei eta beste guztiei!

Irakurketa klub berezia egingo dugu Literaktum jardunaldietan

Maiatzaren 3tik 14ra Donostian egiten ari diren Literaktum Hitzen Hiria jardunaldietan izango da aurten Galtzagorri Elkarteaa Irakurketa Klubetako Izarrak jarduerarekin. Bularretik Mintzora egitasmoaren barruan egiten den Irakurketa Klubaren antzekoa izango da, baina kasu honetan Irakurketa Klubetan erabiltzen diren liburu eta hitz-joko izarrak erabiliko ditu Lur Korta kontalari eta dinamizatzaileak. Maiatzaren 12an, izango da, 17:30etik aurrera Alderdi Ederren, 6-8 urte bitarteko haurrentzako eta haien guraso edo hezitzaileentzat.

Aejae taldeak irabazi du PUBLIKOAREN SARIA 33 botoren aldearekin

Apirilaren 30ean amaitu zen Liburu Gaztea Book Trailer Lehiaketan botoa emateko epea eta PUBLIKOAREN SARIA, 160 botorekin, aejae (Mogel Isasi ikastetxea) taldearentzat izango da Ikastetxeen kategorian. Norbanakoen kategorian, berriz, sekulako aldearekin irabazi du Ssati taldeak; 58 boto eskuratu ditu, bigarren bozkatuenak (JEAJ taldeak) 3 boto baino ez ditu lortu. Horrez gain, epaimahaiak ere erabaki ditu sari nagusiak, baina irabazleen izenak sari-banaketa ekitaldian jakinaraziko dira. Ekitaldia maiatzaren 13an Donostian, Tabakalerako zinema-aretoan egingo da.

Galtzagorri Elkartea · Zemoria 25, Behea 20013 Donostia ·