Galtzagorri Elkartearen webgunea

liburu-gaztea
Bularretik Mintzora
Liburuen altxorra

Galtzaberri

Bilaketa:

2017an Espainian argitaratutako liburuen ohorezko zerrenda bildu du katalogo batean OEPLIk

“ESPAINIAKO HAUR ETA GAZTE LITERATURA. OEPLI-REN LIBURU HAUTAKETA 2017” izena jarri dio OEPLIk, bere lau lurralde atalek egindako hautaketa lanaren ondoriozko Liburu/Katalogo honi. 2018ko Boloniako Azokan presente egon den Katalogo hau Espainiako Hezkuntza, Kultura eta Kirol Ministerioaren lankidetzari esker argitaratu da. Bertan, Espainiako lau hizkuntza ofizialetan 2017an argitaratutako 200 libururen aipamenak jaso dira. Kalitate eta egokitasun irizpideen arabera hautatuak izan dira guztiak. Horien artean, 0 eta 18 urte bitarteko haur eta gaztetxoentzako euskarazko 20 izenburuak Galtzagorriko kide diren Asun Agiriano bibliotekariak eta Miguel Asiain irakasleak hautatu dituzte.

241 book trailer lehiatuko dira Liburu Gaztea Lehiaketan

2017-2018 Liburu Gaztea Book Trailer Lehiaketara 241 book trailer aurkeztu dira: 237 Ikastetxeen kategorian eta 4 Norbanakoen kategorian. Aurtengo irakurgai gomendatuak Jon eta Mirka, Ina, nire ama afrikarra, Ez da konprenitzen ahal gerra eta Tximeletaren oihua izan dira.

Hala ere, parte hartzaile askok jo dute Ezinbestekoen zerrendara liburua hautatzerakoan eta oso irakurriak izan dira Anaren bakardadea, Iqbalen historia, Lur zabaletan, eta Pijama marradunaz jantzitako mutikoa, besteak beste.

Guztira, Gipuzkoako 22 ikastetxek eta Arabako 3k hartu dute parte; 2.100 ikasle inguru.

2018ko Andersen eta Astrid Lindgren Sarien irabazleen izenak eman dituzte jakitera Boloniako Azokan

Eiko Kanodo idazle japoniarra eta Igor Oleynikov ilustratzaile errusiarra izan dira aurtengo Hans Christian Andersen sarien irabazleak. Haur eta gazte literaturaren “Nobel txikia” bezala ezagutzen den sari honen bidez euren obra osoaz haur eta gazte literaturari ekarpen garrantzitsua egin dioten idazle eta ilustratzaileei euren lanaren errekonozimendua eskaini nahi die IBBYk; ibilbide oso bat saritzen du beraz. Bestalde, 2018ko Astrid Lindgren Memorial Award sariaren irabazlea eman da aditzera: Jacqueline Woodson (Ohio, 1963) idazle estatu batuarra izan da garaile.

Irakurzaletasuna sustatzeko irakasleentzako lantegiak hastera doaz

Gaur eskainiko dugu Eusko Jaurlaritzako Kultura eta Hizkuntza Politikako Sailak eta Galtzagorri Euskal Haur eta Gazte Literatura Elkarteak sortutako proiektu berri honen lehenengo Lantegia. Lasarte-Oriako (Gipuzkoa) Oriarte BHI ikastetxeko irakasleentzat izango da lehenengo saioa. Bertara hurbilduko da Intza Alkain, Galtzagorri Elkarteko aholkularia.

Ekimen honen bitartez Galtzagorri Elkarteko profesionalak Euskadiko Haur Hezkuntza, Lehen Hezkuntza eta Derrigorrezko Bigarren Hezkuntzako zentroetara joango dira, irakasleei lantegi praktikoak eskaintzera. Gurditxo batean Euskarazko Haur eta Gazte Literaturako 40 liburu inguru eramango dituzte eta hauen bidez landu ditzaketen estrategiez mintzatuko zaizkie irakasleei, hauek haur eta gazteen irakurketaren bitartekari eraginkorrak eta motibatuak bihurtuz.

Idoia Beratarbideren lanak Ilustratzaileen Txokoan ekainera arte

Sortzaile polifazetikoa da Idoia Beratarbide oiartzuarra: liburuen ilustratzaile, sorkuntza tailerren emaile, Kultur kudeatzaile, arropa diseinatzaile eta egile, aktore, editore… Euskal Haur Literaturan 10 liburutik gora ilustratuak ditu, baina hainbat proiektuetako kartelak eta azalak ere diseinatu ditu. 2013an 100tze espazioa zabaldu zuen Oiartzunen.

Donostiako Aiete Kultur Etxeak eta Galtzagorri Elkarteak elkarlanean antolatzen duten 22. Ilustratzaileen Txokoaren protagonista da Beratarbide. Ekainaren 10a arte bere obra eta inspirazio iturri balio izan zaizkion objektuak eta sortzeko erabiltzen dituen lanabesak ikusgai izango dira Aieten.

Sakanan booktube kedadak

Booktube bat liburu bati buruzko kritika edo iruzkina da, liburu baten irakurketa gomendatzeko norberak bere buruari egindako bideo-grabazioa, ondoren Youtuben zintzilikatzen dena. Ingelesezko book (liburua) eta Youtube (Interneteko bideo plataforma) hitzen batuketatik sortutako neologismoa.

Mundu osoan, Booktube fenomenoak arrakasta itzela du gazteen artean. Hori dela eta, gazteen irakurtzeko zaletasuna sustatzeko asmoz, Galtzagorri Elkarteak Eusko Jaurlaritzako Liburutegi Zerbitzuarekin elkarlanean iaz hainbat kedada edo juntadizo burutu zituen Euskal Autonomia Erkidegoko herritako liburutegitan Booktuberboom egitasmoaren baitan. Bada, Nafarroako Sakanako Mankomunitateko Euskara Zerbitzuak ere booktube kedadak antolatzeari ekin dio. Hala, lehendabizikoa ostiral honetan, martxoaren 16an egingo dute Ziordiko liburutegian. Hurrena, Altsasun izango da, apirilaren 20an. Bi kedada hauez gain, Sakanako Mankomunitateak antolatzen duen Haur eta Gazteentzako Maria Markotegi literatur lehiaketaren baitan kategoria berri bat sortu dute 2018ko edizioan: booktubeak kategoria, hain zuzen. Galtzagorri elkarteko profesionalek booktube kedada horiek gidatuko dituzte.

Komiki lehiaketa antolatu du OEPLIk aurtengo Haur Liburuaren Eguna ospatzeko

Apirilaren 2an, Hans Christian Andersenen jaiotzaren urtemugaren harira, HAUR ETA GAZTE LIBURUAREN NAZIOARTEKO EGUNA ospatzen da mundu zabalean. Urtero bezala, OEPLIk, bere lau atalekin batera: Consejo General del Libro Infantil y Juvenil, Consell Català del Llibre Infantil i Juvenil (ClijCAT), Asociación Galega do Libro Infantil e Xuvenil (GÁLIX) eta Galtzagorri Elkartea, egun hori ahalik eta herririk gehienetan ospatu dadin nahi du. Hori dela eta, Galtzagorri Elkarteak Euskal Herriko liburutegi, liburu-denda eta ikastetxe guztiei dei egiten die egun horren ospakizunetan parte hartzera eta aurten IBBYren Letoniako atalak prestatu duen mezua eta kartela zabaltzera. Baita “Andersen Komikian” izeneko lehiaketan parte hartzera ere.

Amaitzear da Book Trailer Lehiaketara aurkezteko epea

Astebete geratzen da Liburu Gaztea Book Trailer Lehiaketara lanak aurkezteko. Martxoaren 9a izango da book trailerrak igotzeko azken eguna eta hortik aurrera epaimahaiaren eta publikoaren esku geratuko da onenak saritzeko lana.

Ikasturte honetan 25 ikastetxe ari dira parte hartzen lehiaketan eta une honetan lanak amaitzen ari dira gehienak. Dagoeneko hainbat book trailer jaso ditugu, guztiak Ikastetxeen kategoriakoak, eta ikusgai daude Liburu Gaztea web guneko Lehiaketa atalean.

Martxoaren 9tik aurrera lau adituk osatutako epaimahaiak aztertuko ditu book trailerrak eta maiatza erdialdean jakinaraziko du bere erabakia.

IBBYk aditzera eman ditu 2018ko Hans Christian Andersen Sarien finalisten izenak

H.C. Andersen Saria mundu mailan Haur eta Gazte Literaturan ematen den Sari garrantzitsuenetakoa da. Saria honen bidez euren obra osoaz haur eta gazte literaturari ekarpen garrantzitsua egin dioten idazle eta ilustratzaileei euren lanaren errekonozimendua eskaini nahi die IBBYk; ibilbide oso bat saritzen du beraz. Azken urteetan IBBYk 5 idazle eta 5 ilustratzaile finalisten izenak ematen ditu jakitera Boloniako Azokan irabazleak zein diren aditzera eman aurretik.

2018ko Sarirako finalistak hauexek dira:

Idazleen atalean: Marie-Aude Murail (Frantzia), Farhad Hassanzadeh (Iran), Eiko Kanodo (Japonia), Joy Cowley (Zeelanda Berria) eta Ulf Stark (Suedia).

Ilustratzaileen atalean: Pablo Bernasconi (Argentina), Linda Wolfsgruber (Austria), Xion Liang (Txina), Iwona Chmielewska (Polonia), Igor Oleynikov (Errusia) eta Albertine (Suitza).

2018ko Ala Delta Saria Patxi Zubizarretarentzat

Edelvives Taldeak Haur Literaturako XXIX. Ala Delta Saria eman dio Patxi Zubizarreta idazleari “Korri, Kuru, Korri!” (gaztelaniazko “¡Corre, Kuru, corre!”) lanarengatik. Liburuak mutiko etiopiar batek Ingalaterrara bidean bizitako abentura zoragarria kontatzen du. Maiatzean izango da kalean, Edelvivesen eskutik.

Galtzagorri Elkartea · Zemoria 25, Behea 20013 Donostia ·