Hemeroteka


Compartir
2021-06-21

Liburu-gomendio bat astero

Bere baitara bildurik. Egilea: Nanen García-Contreras. Bookolia 2021.

Asun Agiriano

Bakardadea koloretan

Aspalditik dakigu bakardadeak eragin oso kaltegarriak izan ditzakeela osasunean. Arazoa gaitz soziala ere bihurtu da, pandemiaren ondorio negatiboetako bat izan baita pertsona asko bakarrik sentitu direla, are gehiago bakarrik bizi direnak.

Album ilustratu honek Julia andere xamur eta maitagarriaren bakardadeaz hitz egiten du, egunak etxean ematen ditu, balkoian, josten, «irudimenari hegaldatzen utziz». Amona kuxkuxero bat dela uste dute ingurukoek, baina ez, kontua da Julia erraz biltzen dela bere baitara. Leihotik kanpora begiratzen duen arren, bere barrura begiratzeko aitzakia da berez.

Ez da album iluna, ez da zuri-beltzezkoa ere. Alaia eta itxaropentsua da. Egileak gure barne mundua bisitatu behar dugula iradokitzen digu, bakardadean zoriontsuak izan gaitezkeela baina besteekiko harremanak izateko gure baitatik irteteak duen garrantziaz mintzo da baita ere.

Ilustrazio teknika estanpazioaren eta koloretako arkatzen arteko nahasketa da. Emaitzak artisau ukitua du. Planoak errepikatzen dira, atzetik eta aurretik ikusten dugu Julia andrearen egunen joana, bere bakardadeak eta joskerak sekula bukatzerik ez balute bezala.

Gure muskulu soziala ahul samar dagoen honetan gehiago lantzeko gonbidapena egiten digu liburuak, zenbat eta gehiago landu orduan eta gehiago indartuko zaigulako.