Hemeroteka


Compartir
2021-07-14

Udan ere literaturaz gozatzeko aukera

Uztailak uda betean sartu gaitu, eta liburuz betetako udaldia eskaini digu beste behin ere. Oporrak dituenarentzat eta lanean segitzen duenarentzat bidaiatzeko, eta, abentura eta emozio berriak bizitzeko aukera paregabea eskaintzen digu literaturak. Baina nondik hasi? Erantzunik ez baduzu, hemen dituzu Euskal Herriko hainbat liburutegiren aurtengo udarako proposamenak. Eta horiekin aski ez baduzu, gure web guneko Dokumentazio gunean bildu ditugun Irakurketa Gidak kontsultatu eta hasi gozatzen!

Urtaro bakoitzarekin ohi dutenez, Aramaioko, Aretxabaletako, Arrasateko, Bergarako, Eskoriatzako, Legazpiko eta Oñatiko Udal Liburutegiek elkarlanean Biblioporrak gida argitaratu dute. Bertan aurkituko dituzu liburu gomendatuen artean: Bisita, Patti eta inurriak edota Doneaneko alaba.

Eibarko Juan San Martin Liburutegiak argitaratu du bere gomendio-sorta: Gozatu udan. Gida honetan sartu dituzte Badatoz piratak!, Ernesto elefantea eta Mikel Larson liburuak, besteak beste.

Baita ere, hutsik egin gabe, Donostiako Udal Liburutegien Sareak irakurgai aukera bat aurkezten digu bere Irakurlee gidan.

Gazte irakurlea bazara, ez ahaztu martxan dugula Booktuberboom egitasmoaren bosgarren edizioa: 14-18 urte bitarteko gaztea bazara, liburu bat irakurri, gidoitxo bat prestatu, kamera piztu, grabatu, eta youtuben zintzilikatu. Eta azkenik, Booktuberboom blogean parte hartze orria bete! Hemen dituzu irakurgai eta komikien proposamenak.

Bilatu gustuko duzuna eta gozatu irakurketaz, gozatu udaz!