Asun Agiriano

Uxío. Idazlea eta marrazkilaria: Martin Romero. Itzulpena: Bego Montorio. Astiberri 2020.

Berri pozgarria haur-komikien zaleentzat: Astiberri argitaletxe indartsuak Txikiberri izeneko bilduma sortu du eta komikiak euskaraz kaleratzen hasi da. Bazen garaia, euskal irakurleak aspaldi irudien eta hitzen gose ginen eta!

Bide berriari ekiteko argitaletxeak Martin Romero, Galiziako marrazkilariaren lan bat aukeratu du, non Uxio protagonistaren abenturak aurkezten zaizkigun. Obra honek A Coruñako Diputazioak ematen duen Haur- eta Gazte-komikiaren arloko Castelao Saria irabazi zuen iaz eta Astiberrik hiru hizkuntzatan kaleratu du.

Kontakizuna istorio laburrez osatzen da, bi orrialdekoak gutxi gorabehera, eta testua letra larriz dago idatzita. Biñetak handiak dira, espazioa ugari dago begirada marrazkietan pausatzeko. Edizio zaindua, azal gogorra, irudi koloretsuak eta, horrela, Uxioren eguneroko pasadizoen berri jasoko dugu; lagunak, eskolako kontuak, Rosenda txakurrarekin duen harreman estua eta abar. Umorea nagusi, abentura eta adiskidetasuna, istorio bizi-biziak irakurtzeko aukera paregabea da.

Bitartekariok badugu komikigintzaren onura narratiboak frogatzeko abagunea eta aldi berean lehen irakurleak badu adinera egokitutako hastapena.