Zeberioko Zubialde eskolako lagunek haien praktika onak zerrendatu dizkigute. Hona hemen martxan jarri dituzten Praktika onak:
Eskolako liburutegia antolatzen amaitu dugu.
Eskolako irakasle bat liburutegi arduradun izendatu dugu eta kutxako materialarekin, kontaketa, kantu, poesia errezitaldi, esku jolas…… martxan jarri ditu astean behin eskolako gela guztiekin, beti ere, helburua gozatzea izanda.
Astean behin, ziklo desberdineko ikasleek, (astero ziklo desberdin bat) liburutegian eskola osoari aldez aurretik landutako ipuin baten kontaketa egin die.
Barikuro, ikasle bakoitzak liburu/ipuin bana eraman du etxera, irakurketa partekatzeko, familia transmizioan eragiteko eta irakurzaletasuna bultzatzeko. Hurrengo astean zehar, liburu/ipuinak ekarri ahala ikasleei ipuina gustatu zaien eta ipuina zelakoa den galdetu zaie. Ekintza hau ahozkotasunean eragiteko aukera itzela izan da.
Hamabostean behin gustoko ipuin eta liburuekin erakusketa bat antolatu da. Erakusketan ipuin/liburu bakoitzaren nondik norakoak kontatu dira.